:+:煎鴨胸配甜辣黑加崙子醬:+: (附食譜)

貪得意又煮煮新菜式~~

10次有9次買咗鴨胸番黎問陳大少點整好, 佢都會話食鹵水鴨片~~ (仲緊要配埋個蒜蓉白醋汁!!!!)

見佢忙忙忙時就唔問佢啦~~~ 涼粉子睇心情隨意煮~~呵~~

想香口少少所次揀左煎嘅方法~~~ 鴨皮多油, 食多兩件怕油膩咩~~

就一於煮埋個甜甜酸酸嘅醬汁啦~~

涼粉子唔多食果醬 (除咗HARRODS藍梅醬), 所以之前好心機朋友自家制嘅果醬都婉拒咗~~ 

但係有次冇啦啦好想食黑加崙子醬 ... (就係咁奇怪丫~)

一次過冇理由食到成樽啦~~

要黎煮醬汁都係一個好辦法~! (大家屋企有其他口味嘅果醬大概都可以照用嘅...)

材料及做法:

鴨胸肉 - 兩件 (洗淨印乾水, 馬莎嘅鴨胸肉買番黎時個皮已經'介'左幾下嘅)

用好少油掃勻LC煎蛋鍋, 大火燒熱後加入鴨胸 (先煎鴨皮嗰邊啦~~~)

呢個時間可以加入鹽同埋黑椒碎

再轉中細火煎到鴨皮金黃~

反轉另一面都係先大火煎封表面 (可以防上肉汁流失), 再中細火煎到比較熟~

視乎想要嘅生熟程度啦~~~ (涼粉子認為中間有少少粉紅就最理想喇~)

涼粉子大約每邊煎左3-4分鐘~

好多鴨油走左出黎..... 倒左啲油... 又再大火煎多鴨皮一陣~~~ 

色水就更加金黃喇~

煎好後隔油~~

唔好即時煎開佢呀~~

同煎牛扒一樣... 要比佢抖一抖... 

呢個時間準備醬汁~~

果醬 + 水 + 鹽 + 糖 + 喼汁  (鍾意食辣嘅我地仲加咗一隻切粒指天椒)

煮一陣... 因為有糖... 個汁好快就好濃稠喇~~

再將煎好嘅鴨胸肉切片... 表面加少少即磨海鹽同黑椒~~

加埋個醬汁就完成了~~~

是日晚餐：
西洋菜陳腎豬骨湯
甜辣黑加崙子醬伴香煎鴨胸片
日式薯仔沙律   ( (篤一篤個名就有食譜連結架喇~))

 蠔油羅馬菜

香口嘅煎鴨胸.. 表面脆脆入面仲有嫩嫩嘅粉紅色~~

唔會出血水又一定唔過熟~~~

配埋酸酸甜甜嘅黑加崙子醬~~~~ 

的確又簡單又好味~~~