:+:+:日式吉列豬扒飯:+:+:(附食譜)

好耐好耐冇整日式吉列豬扒飯了~
大少成日想食炸野...但係我又唔想整炸野..好啦...難得有日心情好...就炸一炸佢~~哈哈哈~~

材料及做法:

豬扒先切開邊邊筋位, 咁炸時就唔會卷起了~(平時切豬扒都係一樣做法啦~)
豬扒唔係好厚身所以唔洗用拍鬆了~

加少少日本醬油, 胡椒粉, 鹽拌勻~

我整左4塊...一係就唔整...一係就整多少少啦~

呢隻麵包糠粉幾好用~~, 粗幼不一咁炸起時口感更佳~

雞蛋兩隻打勻

豬扒上蛋漿前拍上少少生粉~

沾滿蛋漿後就要沾上麵包糠粉

中小火炸至金黃, 炸起前大火幾秒逼番啲油出黎...

放上炸物筲箕上隔油~

左邊嗰塊厚身的...係因為上完第一次麵包糠粉, 再浸一浸蛋漿後再上多一次麵包糠粉

大少呢晚有喺廚房幫手...佢話唔想好似太厚咁...

所以其餘的就都係做左上左一層麵包糠粉... (點知呢..........一陣先講~!)

豬扒要切粗條~

汁料: 

3份日本醬油 + 2份味醂 + 1份水~

o..大少用左炸完豬扒的筷子試味....所以漂浮的..係麵包糠!!!!

之前喺日本100yen店買的小玩具....終於出場...(買埋買埋好多玩具都未開~!!大少提左我幾次~-.-)

洋蔥一小個切幼條~

呢度係半個啦....加入醬汁, 大火煮至滾起~~

拌勻雞蛋一隻

加入豬扒後即加入蛋漿...

幾秒就要即時離火了~~!!

煮埋日本米飯飯......將煮好的豬扒連埋汁倒入飯面就ok了~!!

愛蔥的人當然要加幾粒蔥花啦~~!!

上面將相的豬扒...就係兩層麵包糠粉...

試唒兩款豬扒後....

大少: 又真係2層麵包糠粉好味啲呀~!!表面脆啲面下面又吸左更多汁...

我:    都話左係兩層架啦...好耐之前睇唔知咩日本節目人地都係兩層架嘛...

大少 (邊食邊講): 係囉..... 好耐冇食唔記得左丫嘛...你整多d啦~~~

我:    你頭先由頭到尾都望實架嘛...下次你整咪得囉~~~

大少: 我次次睇完你整番都唔同味架....

我:    又係你話整多幾次就會好嘅.......

.
.
.
.
.
.


之後...佢又好有技巧地轉左話題.....

哼~!!!!!!

丫...同場加映...

對上一次整的吉列豬扒~~

個亮點係....

張相個日期丫~~~哈哈哈哈哈~~