:+:瑤柱臘味糯米飯:+: (附食譜)

糯米飯真係整過N咁多次...

連食譜都好似出左3個喇~~

不過...... 難得陳大少話咁多次糯米飯今次呢個最好食....

又再黎多個食譜仔都冇所謂啦~!!

今次應該係加咗瑤柱~~~ 所以陳大少覺得啖啖都有瑤柱絲更加好味??

初時明明有人見涼粉子話冇力整生炒仲咀藐藐架囉~!!! 哼~~~

材料及做法: 

糯米先用清水浸一晚之後洗淨瀝乾~

加少少鹽同麻油拌勻~~

平均舖喺蒸盤上面~

瑤柱洗淨後用清水浸軟後鬆開~ (瑤柱水留用~)

一半放喺飯面~~

放入蒸爐攝氏100度蒸15分鐘~

蝦米洗淨後用清水浸軟~

加入攝氏100度蒸爐蒸8分鐘~
(蝦米水留用~)

冬菇清水浸軟後切幼粒~
臘腸膶腸洗淨後切粒~ (今次都係用咗榮華嘅臘腸膶腸, 英國嘅始終都係唔啱口味~)

用好少好少油炒香臘腸膶腸粒, 再加入冬菇炒至乾身~

之後加入蒸好嘅蝦米同瑤柱炒至乾身後加入瑤柱水同蝦米水再炒至乾身~

舖喺蒸咗15分鐘嘅糯米飯上面~~ (呢個時候如果見到糯米飯粒太乾身可以灑少少水~)

再蒸多15分鐘至糯米飯全熟~~~~

灑上蔥花同埋加入少少甜豉油就完成喇~~~

食前先拌勻~~

蒸嘅糯米飯都可以做到粒粒乾爽又分明~~ 

仲一定健康過要落油嘅生炒糯米飯啦~~

加入瑤柱絲就更加甘香可口~~~

之前嘅糯米飯食譜仔:

:+:生炒糯米飯:+: - 簡約食譜 (篤一篤個名就有食譜連結架喇~) 

:+:生炒糯米飯:+: - 有步驟圖食譜 (篤一篤個名就有食譜連結架喇~)

:+:簡易臘味蒸糯米飯:+: 有步驟圖食譜 (篤一篤個名就有食譜連結架喇~)