2014年11月17日星期一

:+:豆漿豚肉鍋:+:涼粉家晚餐 (09.11.2014)

貪得意.. 打邊邊都要打得有新意~ 

(哈哈哈... 我平時唔係咁押韻架~~~)

倫敦呢排日日落雨...都冇咩心機出街街...

(拍拖去街街一定要扮到靚靚咁.. 但係一出到街, 橫風橫雨吹到頭髮亂了... 雨水又整花個精心化好嘅妝... 瀟灑啲浪漫啲唔拎傘就變落湯雞... 拎住傘同風對抗又好狼狽.....     
所以... 都係算吧啦~~~)

呢個星期日除左出去超市買左大大大量蔬菜水果同埋同卡卡豬去散步之外...

就宅喺屋企嚕~~ (幾時都係喺屋企最舒服自在~~)

凍凍地嘅天氣就最好打邊邊啦~~~

今次特別少少... 準備左個:+:豆漿豚肉鍋:+:



豬肉片係喺HMART買嘅~~


價錢合理質素好... 超讚~

應該係肉檔叔叔處理手法同平時超市唔同...

所以佢冇左陣英國豬肉特有嘅肉臊味~~~ 非常好呀~!!! 


涼粉子同陳大少都係麻麻地蟹柳... 不過上次日式火鍋時試過呢款蟹柳

味道同質地都幾好~~~

所以... 回購左~~~!!


好快:+:豆漿豚肉鍋:+:就準備好了~

有鮮冬菇, 旺菜, 大虎蝦, 豬肉片, 粟米, 白蘿蔔, 玉子豆腐, 迷仔甘荀

(菜菜當然係任添啦~~~ 我地兩個食左一個半旺菜丫~~~)


又係HMART, 哈哈哈~~~

陳大少好鍾意食烏冬... 急凍烏冬質地夠唒滑又夠煙韌~~

不過次次都唔係入好多貨... 因為... 佢都幾阻冰格嘅位架~!!!


本身係打算出動好耐冇整的自家特濃豆漿~

不過... 由於時間關係~~ 哈哈哈~~~ 買左現成無糖豆漿 ~


當然...調一調味先用會比較好啦~~~

豆漿2:清水1, 加少少麻油+胡椒粉+鹽

大火煮滾就可以架喇~~~


煮滾左嘅豆漿加入鍋內 (用LC 26CM BUFFET打邊邊都係第一次咋~~)

用豆漿黎煮嘅蔬菜真係特別鮮甜好味~~ 而豬肉片都特別滑~

第一次食豆漿鍋嘅陳大少食得好開心~~

一定會再ENCORE架~~~


因為食豆漿鍋... 唔係太想飲酒....

(怕會撞到肚仔痛丫~~)

所以呢餐... 涼粉子飲忌廉加鮮奶~~~

以前細個覺得好難飲.. 但係呢排又幾鍾意啵~~

人....真係好善變架~~

哈哈哈~~~


10 則留言:

  1. 好衰架,引人o也,呢排香港凍左好多,其實唔凍時都鐘意打邊邊,家下一凍更加想....好想吃呀!

    回覆刪除
    回覆
    1. 嘻嘻... 冇呀冇呀...冇引你呀~~~ 我地呢邊凍左好多... 我都好想瘋狂打邊邊呢~!!!! 香港打邊邊正好多丫.. 我最想食鯇魚... 可惜倫敦唔多覺有~~~~~ >_<

      刪除
  2. 正呀~~我由細到大都喜歡忌廉溝鮮奶~~好飲呀!!識貨^^

    回覆刪除
  3. 我都鍾意飲忌廉溝鮮奶, 感覺好似食雪糕

    回覆刪除
    回覆
    1. 係啵.. 你講起佢似雪糕... 如果將忌廉溝鮮奶整沙冰或者係雪糕應該都會好正呀~

      刪除
  4. 這個豆漿鍋好吸引呀,尤其這兒已經下了兩天雪,好想食啊!

    回覆刪除
    回覆
    1. 一聽到個雪字就覺得好凍凍凍~~~~ 你要注意保暖呀~!!

      豆漿鍋又真係唔錯架.. 你都試吓整啦~~

      刪除
  5. 涼粉子:
    ~你哋兩個人, 要即慶食啲咩, 都可以好方便.
    ~我覺打邊爐, 其實可以減到肥, 食多啲蔬菜和海鮮,已經清啖好多!!
    ~咸豆腐, 原來係咁樣整!!

    回覆刪除
    回覆
    1. 丫.. 我都覺呀. 我食得最多菜嘅晚餐就係打邊邊~~~~ 兩個人想食咩就食當然方便~~~ 但係你地有家庭樂丫嘛~~~

      刪除