:+:三個月了:+:

時間過得好似好快又好慢... 卡卡豬都走咗3個月了~~

一直以黎都未有心情打番篇BLOG, 不過為免冇睇開FACEBOOK嘅大家問起卡卡豬去左邊~~

所以都係出番篇BLOG啦~~

我地很好~~ 唔洗擔心~~

 

 就係有一晚, 陳大少放工番黎同卡豬如常去個街街先番黎預備食晚飯~~~

玩玩吓, 追追吓狐狸, 一停低.. 就瞓咗喺地下全身冇力咁, 好似心仔痛咁唔唔唔左兩三吓~~

涼粉子出去同陳大少攬住卡卡豬, 抱左佢上車, 我攬住卡卡豬坐前面邊打電話去寵物醫院, 陳大少邊手震震開車過去~~

可惜.. 卡豬都走咗嚕~~

好肯定嘅係卡豬知道自己當晚要走嘅~~

卡卡BB時望住涼粉子食藍色DORITOS粟米片, 涼粉子話過.. 叫卡卡未夠20歲唔好問我拎薯片食.. 因為狗狗食唔食得薯片架嘛~~~ 但係當晚涼粉子真係唔知做咩冇啦啦開咗包黎食... 瞓緊覺嘅卡豬瞓到朦朦鬆鬆咁行入黎書房問坐靚靚比手仔我呃薯片食~!! 我就真係比左兩塊佢食.. 而其實自己都係食左兩塊~~ !! 平時卡卡豬見我地食薯片係唔會黎冤我地架~~!!

到到卡豬同陳大少出街前, 涼粉子有摸摸佢頭仔, 叫佢乖乖跟爸爸出去玩~~ 卡豬行到大門口回頭望實我.. 我都會永遠記得~ 平時佢多數都係心急去街, 快快手手去完街街番黎等開飯架嘛~~~~

到到陳大少兩日後話番比我知, 其實嗰晚佢地出門口前, 佢唔知做咩冇啦啦同陳豬卡頭貼頭... 仲自己同卡卡講左句: 好啦, 知道, 明白喇~~  (至於豬卡傳咗咩比陳大少令到佢會咁講, 陳大少點都諗唔起~~ 不過~~ 卡卡嘅心思, 我地都明白~~)

到到我夢見卡卡, 笑醒左~~ 到到陳大少幾日後有一朝又笑醒左~~ 哈哈~~~ 嗰陣嘅心情又點會識笑仲要發夢笑醒左呢~~

而奇怪嘅事又唔止咁少~~

陳大少初頭幾晚差唔多晚晚都聽到卡卡豬喺屋企行路腳仔掂到地板嘅噠噠聲~~涼粉子話完聽唔到之後, 同一晚.. 我地兩個都喺書房打算睇吓一齊去轉旅行散散心~~ (而且宜家我地去邊卡卡豬都可以跟埋一齊去啦~~~ ) 就係半夜3, 4點, 平時卡豬瞓到豬豬咁起身去飲水嘅時間~~~ 我地一齊聽到好大聲好清晰嘅 '噠噠'~~ 你眼望我眼後~~ 陳大少話: 咪就係呢啲聲囉~~ 

聽左咁多年唔會聽錯,而且次次唔係同一個位嘅.. 有時係喺我地張床跳落黎... 有時喺書房~~ 上兩個星期陳大少喺浴室邊開住蘋果動新聞邊加緊熱水咁嘈.. 都聽日浴室外一吓好清晰嘅'噠噠' , 就係之前卡卡陪我地睇實我地浸浴嘅聲啦~~

事發後幾日.. 陳大少都仍然係喺'如果嗰晚冇同卡卡去街...  '如果...'... '早知....' 涼粉子忍唔住炳佢邊有得黎咁多如果如果早知早知丫....就係我炳完佢之後, 佢出門口番工, 涼粉子自己一行出廳~~~ 就有一大陣卡味團團轉咁圍住我~~~ 講左句話知道佢唔鍾意我炳佢爸爸丫嘛~~ 之後陣味就散左了~~ 點大力吸大力索都聞唔番~~~

卡豬回魂當晚, 陳大少話噠噠聲係最多嘅 (涼粉子瞓著左啦~~) , 陳大少話好似見到一個灰朦朦嘅一團影啖我地床尾~~ 不過佢當時係半夢半醒咁~~~~ 都唔知係發夢定係真係見到喇~~~

5月中時涼粉子番左香港一轉, 隨身帶住卡豬條金鏈, 有一晚, 涼粉媽拎住條金鏈落街行吓, 喺海旁坐陣~~~ 到到走時講左句, 好啦, 卡卡我地番屋企喇~~ 即時左邊傳黎一陣卡卡味~~~ 就係一吓... 再吸真啲就冇左~~

仲有隻貓貓, 卡豬走左幾晚之後, 我發現左屋企廚房望出去時時見到有貓貓望住我地屋企... 一隻細, 一隻大... 我地有時飯後出去散步, 細嘅貓貓會跟住我地行... 有時仲會喺我地前面反轉左個肚仔~~~   到到宜家... 煮飯嘅時候通常都會見到隻貓貓, 就好似之前卡卡陪我煮飯一樣~~

飯後散步又會見到貓貓, 佢見到我地就會跑埋黎....  我地都覺得係卡卡話佢知我地屋企好多好野食~~ 叫貓貓黎陪吓我地~~ :)

嘻嘻~~~ 

雖然話卡卡走左~~ 但係有時又好近咁~~~ :) 

我地知道, 只要我地過得開心, 卡卡豬都會開心~~~